Ég er bara ég

Ég verð sjaldan veik. Eða ókei, ég kannski bara sætti mig sjaldan við að vera veik. Ég ætlast til þess af líkama mínum að hann virki öllum stundum og get orðið skelfilega svekkt út í hann ef hann þarf hvíld eða pásu frá dagskránni minni. Ég hef sárasjaldan hringt mig inn veika í vinnunni til dæmis en talsvert oftar staðið vaktirnar mínar raddlaus eða tognuð á hendi eða fæti. Mér dettur ekki í hug að sleppa því að mæta í skólann þó að ég sé sárlasin. Ég mætti í einn tíma í haust þar sem ég var alveg í klessu af hálsbólgu og kvefi, mér fannst bara svo mikil synd að sleppa honum úr því þetta var ekki nema einn tími. Eðlilegt fólk hefði sennilega hugsað þetta öfugt, að það væri nú meira en sjálfsagt að sleppa skólanum þennan daginn, úr því þetta væri bara einn tími. En ekki ég, nei nei.

Ég er líka haldin eins konar skrópfóbíu. Ég sleppi bara ekki tímunum mínum, ég meika það ekki. Það er ekki það að ég hafi svona sjúklega gaman af þeim öllum, alls ekki. Ef ég sleppi tíma þá eyði ég deginum í að velta fyrir mér hverju ég gæti hafa misst af. Á fyrsta árinu mínu í HÍ sleppti ég tveimur tímum, minnir mig. Einu sinni þurfti ég að fara til læknis (þetta var eini lausi tíminn hjá lækninum, ég lét auðvitað athuga það) og í hitt skiptið var snjóstormur og lögreglan skipaði fólki að halda sig heima. Ég var samt ekki langt frá því að halda af stað út í bylinn en þegar faðir minn, hjálparsveitarmaðurinn, sagði mér frá öllum bílunum sem væru fastir út um allt ákvað ég að vera heima. Það var samt ekki vegna þess að ég var hrædd um að festast á Nissan X-trailnum, heldur af því að mig grunaði að það væri einhver annar á smábíl sem væri fastur og þar af leiðandi fyrir mér svo ég kæmist ekki mína leið í skólann.

Ég glími við alvarlegan prófkvíða. Held ég. Jú, ég geri það. Prófkvíðinn er yfirleitt í dvala og lætur ekki á sér kræla fyrr en kvöldið fyrir próf. Þá fær allt að flakka og því miður er það oftast elsku Jóhann minn sem verður fyrir barðinu á því. Hann hefur lært af reynslunni og er farinn að bregðast mjög skilvirkt við þessum köstum mínum og minna mig á öll hin (ekki)skiptin þar sem ég „vissi ekki neitt“ eða „féll“ á prófunum. Ég reyni sífellt að halda því fram að í þetta skiptið sé þetta öðruvísi og nú muni ég sko falla. Það hefur ekki gerst ennþá. Ég mun samt áreiðanlega halda því aftur fram í desember, úff.

Ég er alltaf í svörtu. Kannski ekki öllu svörtu en það líður aldrei nokkurn tímann sá dagur þar sem ég klæðist engri svartri flík. Þegar ég sé fallega flík eða hlut í lit kemur oftar en ekki einhver svartur skynsemispúki upp í hausinn minn og segir mér að kaupa hlutinn frekar í svörtu, það sé skynsamlegra. Jóhann spurði mig um daginn hvað ég myndi gera ef allar svörtu flíkurnar myndu hverfa úr skápnum mínum. Ég varð bara stressuð við tilhugsunina. Einu sinni ætlaði ég á árshátíð og var ekki viss hvort græni eða bleiki kjóllinn yrði fyrir valinu. Ég nefndi það við vinkonu mína og sagði henni að það væri gríðarlega líklegt að ég myndi enda á svörtum kjól, þrátt fyrir að það væri ekkert að hinum tveimur. Og viti menn, ég fór á árshátíðina í öllu svörtu og með eitthvað blátt hálsmen til að reyna að fela veikleika minn. Það gekk ekki. Allir skórnir mínir eru líka svartir. Nema rauðir hælaskór sem ég hef bara notað einu sinni, af því þeir eru ekki svartir. Jesús minn.

Regrets are made for losing, embrace your imperfections.

Það segir Svavar Knútur.

hldr

Ljúfir tónar

Ég hlusta ekkert gríðarlega mikið á tónlist. Ég gerði það einu sinni, þá átti ég iPod sem stóð með mér og gerði það sem ég vildi. Svo datt ég í læk og iPodinn eyðilagðist svo ég fékk mér nýjan undir eins til að geta haldið áfram að hlusta á tónlistina mína. Sá nýi olli mér hins vegar agalegum vonbrigðum, kveikti  sjálfur á sér þegar honum hentaði og var því alltaf batteríslaus. 

Þetta varð til þess að ég fór að nota iPodinn lítið sem ekkert og tók geislaspilarann minn aftur í notkun. Þá brenndi ég mig náttúrulega á því að ég átti ekkert nema Pottþétt diska sem ég var lítið spennt fyrir að hlusta á. Ég hef því undanfarið beðið um geisladiska í jóla- og afmælisgjafir og keypt mér þá sem ég hef ekki getað beðið eftir. Mér finnst líka miklu skemmtilegra að eiga geisladisk í hulstri og jafnvel með textum heldur en að eiga bara lög í tölvunni. 

Þegar við Jóhann byrjuðum saman (í þetta skiptið) kynnti hann mig fyrir tónlistarmanninum Svavari Knúti. Saman höfum við grúskað svolítið í tónlistinni hans og fylgst með honum síðastliðin fjögur ár. Hann er aðallega trúbador sem kemur ýmist fram einn eða með öðrum. Ég á plötu með honum og söngkonunni Kristjönu Stefánsdóttur sem ég held mikið upp á.

Platan heitir Glæður og á henni eru tíu lög sem eru ýmist cover-lög eða samin af Svavari eða Kristjönu. Ég fæ hreinlega ekki leið á þessari plötu og hlusta stundum á hana nokkrum sinnum í röð ef ég nenni ekki að skipta um disk í tækinu.

Mér fannst kominn tími á að blogga um eitthvað annað en markmið og meistaramánuð og þetta er ljúf plata sem mér finnst að fleiri mættu vita af.

hldr

75 STIG

Ég er ánægð með mig. 

Ég er aðallega ánægð með að hafa þorað að setja mér markmið. Ekki bara eitt, heldur tíu. Ég horfðist í augu við þau öll og sinnti þeim öllum á einhvern hátt. Ég vann mér inn 75 stig af 100 mögulegum og mér finnst það góður árangur. 

Markmiðin mín voru kannski ekki alveg þess eðlis að hægt væri að "ná" þeim. Ég get því ekki beint sagt að ég hafi náð öllum markmiðunum mínum en ég notaði þau til að vera betri útgáfa af sjálfri mér. Með því að hafa þau sýnileg og minna mig á þau þá hafði ég ekki afsökun til að sleppa þeim eða gleyma. Einnig hefur það hjálpað mér að setja þau fram á þennan máta, að blogga um þau. Þá er fólkið í kring um mig líka meðvitað um hvað ég ætla mér og passar þannig upp á að ég haldi mig við efnið. 

Ég er líka ánægð með að hafa haldið mér frá neikvæðniköstum þegar mér gekk illa. Ég hef einu sinni áður sett mér markmið á ævinni, markmið sem hægt var að ná. Það munaði svo agnarlitlu að ég næði því og varð í kjölfarið gríðarlega óánægð með sjálfa mig. Góð vinkona benti mér á að ég mætti ekki gleyma því að vera ánægð með það sem ég hafði áorkað, þrátt fyrir að ég hafi ekki náð nákvæmlega því takmarki sem ég setti mér í upphafi. Í þessum mánuði hef ég lagt mig fram við að vera ánægð með það sem ég geri vel og gera mér grein fyrir mistökunum en sleppa því að velta mér upp úr þeim. Með það að leiðarljósi líður mér svo miklu betur og hef meiri þrótt til að halda áfram.

Talandi um að halda áfram, þá er ég alls ekki hætt að vinna í markmiðunum mínum. Þau standa ennþá en ég ætla að reyna kannski fremur að einblína á færri í einu og sinna þeim þá enn betur. Núna fram að jólum ætla ég að halda áfram að hreyfa mig reglulega og gera meiri kröfur til mín á því sviði. Ég ætla að leggja mikla áherslu á mataræðið og vona að það skili sér jafnvel í ögn víðari flíkum um jólin. Ég ætla að drekka minnst tvo lítra af vatni á dag og helst meira. Svo verður blessaður skólinn víst að fylgja með þar sem næstu vikur eru troðfullar af verkefnaskilum og tvö lokapróf ljúka svo misserinu í desemberbyrjun. Úff.

Það þýðir ekkert minna en að takast á við þetta með jákvæðnina að vopni. Líkt og segir í ágætum skátasöng: "Brosum, þá er sigur vís."

hldr

5/5 - 16 stig

Meistaramánuður er búinn. Ég geri mér grein fyrir því að það eru nokkrir dagar síðan hann kláraðist en dagskráin hefur verið ansi þétt hjá mér þessa fyrstu daga í nóvember. Hér er síðasta samantektin. Hún verður bara stutt í þetta skiptið og svo ætla ég að fara yfir mánuðinn í heild sinni á morgun.

1. VAKNA/SOFNA:   2 stig
2. HREYFING:   2 stig
3. MATARÆÐI:   2 stig
4. VATN:   2 stig
5. SKÓLI:   2 stig
6. FÖT/SKART/SNYRTIDÓT:   2 stig
7. NAGLALAKK:   0 stig
8. SKIPULAG:   2 stig
9. ÖÐRUVÍSI:   2 stig
10. BLOGG:   0 stig

 Samtals: 16 STIG

Hér er svo mynd af John Lennon úr kaffi af því ég seldi bilað mikið kaffi um helgina, þökk sé Airwaves. 

hldr

4/5 - 16 stig

Fjórða vikan er búin, nú er bara ein eftir sem er samt eiginlega bara hálf. Bæði er hún styttri en hinar og svo eru líka búnir tveir dagar.
Síðasta vika var ekki beint til fyrirmyndar í bloggmálum en hún var ágæt í flestu öðru. Ég var á kafi í hljóðfræðilærdómi og þess á milli nýtti ég tímann í ræktinni, sundi eða afslöppun.

1. VAKNA/SOFNA:   Þetta fór svolítið 50/50  - 1 stig
2. HREYFING:  Þetta virðist sjaldan klikka hjá mér  - 2 stig
3. MATARÆÐI:  Virku dagarnir voru góðir en helgin hefði mátt ganga betur - 1 stig
4. VATN:   Ég var dugleg að þamba vatn yfir lærdómnum - 2 stig
5. SKÓLI:   Einkenndist svolítið af undirbúningi fyrir prófið en gekk þó vel - 2 stig
6. FÖT/SKART/SNYRTIDÓT:   Já já já - 2 stig
7. NAGLALAKK:   Ég smellti á mig dökkrauðu um helgina - 2 stig
8. SKIPULAG:   Vikan var vandlega kortlögð til að ekkert gleymdist - 2 stig
9. ÖÐRUVÍSI:   Ég lærði á Þjóðarbókhlöðunni á fimmtudaginn, það hef ég aldrei gert - 2 stig
10. BLOGG:   Ekkert - 0 stig

 Samtals: 16 STIG

Planið um 20 stig gekk ekki alveg eftir en ég er sátt. Ég sé enga ástæðu til að vera óánægð með þetta.

Mér hefur gengið hvað verst með níunda markmiðið. Ég hef ekki verið nægilega meðvituð um að breyta út af vananum en ákvað ég mætti nú alveg fá stig í þetta skiptið. Þetta er engin meiriháttar tilbreyting en samt eitthvað sem ég hef ekki gert og af einhverjum ástæðum ekki viljað gera. Ég komst að því að það er ekkert svo galið að læra á Bókhlöðunni, sérstaklega ef maður ætlar að einbeita sér að lestri og vera laus við truflun. Ég mun sennilega láta sjá mig þarna oftar.

Bloggi skal fylgja mynd. Ég var þokkalega dugleg að gera mér nesti í síðustu viku og var meðal annars alltaf með svona á mér. Þetta er lítið box á stærð við lófann minn sem ég fyllti af kókosflögum, möndlum, pekanhnetum, þurrkuðum trönuberjum og döðlum. Ég hélt fyrst að þetta box væri allt of lítið en svo er það bara afskaplega passlegt fyrir daglegan skammt af gúmmulaði sem er ekki meinóhollt. Þetta box kom sér vel þegar ég fékk þörf fyrir eitthvað sætt eða einfaldlega eitthvað að narta í en ég þurfti passa að það entist allan daginn. 
Hnetur og þurrkaðir ávextir eru vissulega uppfull af hitaeiningum og eru góð í hófi eins og allt annað. Einu sinni las ég að í einum litlum poka af möndlum (100g held ég) eru um 500 hitaeiningar svo það er eins gott að gæta hófs í þessum efnum. Pekanhnetur eru held ég enn ríkari af hitaeiningum og trönuberin aðeins sykruð. Svo eru döðlurnar stórhættulegar, svo góðar en ansi dýrar fyrir hitaeiningakvóta dagsins. Þarna þarf því að passa sig vel og því hentaði mér prýðilega að hafa svona mátulega lítið box af sælgæti með mér inn í daginn. 


Ég fékk skilaboð í gegn um Facebook í byrjun síðustu viku frá stelpu sem ég hef ekki verið í miklu sambandi við undanfarin ár. Hún sagðist hafa fylgst með blogginu mínu og vildi láta mig vita af því að hún hefði fulla trú á mér og óskaði mér góðs gengis í stigasöfnuninni. Þessi skilaboð glöddu mig mikið og komu mér á óvart, ég á svolítið erfitt með að gera mér grein fyrir því að ólíklegasta fólk getur lesið þetta hjá mér. Mér finnst samt afskaplega gaman að heyra svona hluti og ég hef fengið ýmis hrós í tengslum við bloggið mitt. Ég hef agalega gaman af þessu og ætla hiklaust að halda áfram þó svo að meistaramánuður klárist á fimmtudaginn.

Takk fyrir að lesa.

♥

hldr

3/5 - 16 stig

Lítið um blogg þessa dagana hjá mér. Helgin var uppfull af allskonar og innihélt meðal annars vedískulærdóm, vísindaferð í Morgunblaðið, Stúdentablaðssamkvæmi, vinnu og kósíkvöld með vinkonum. Á morgun tekur við ný skólavika með verkefnaskilum og öðru lokaprófi, nú í hljóðfræði. Svo fæ ég Jóhann minn heim frá Noregi sem verður aldeilis ljúft. Nú reynir á markmið númer átta að tvinna saman prófalærdóm, verkefnavinnu, undirbúning fyrir kennslustundir, hreyfingu og jafnvel smá frítíma. Það verður bara áskorun!

Ég ætla í fyrsta skipti að standa við það sem ég sagði í upphafi og taka saman stigin á sunnudagskvöldi (en ekki mánudegi eða þriðjudegi eins og síðustu tvær vikur). Mér fannst þessi vika bara ganga vel, að vísu gengur mér alveg skelfilega að vinna í níunda markmiðinu, mér til mikils ama. Hugmyndir vel þegnar!
Jæja, svona lítur þetta út:

1. VAKNA/SOFNA:   Já já já, þetta var í góðum málum  - 2 stig
2. HREYFING:   Fullt hús og ein aukahreyfing í skaðabætur fyrir síðustu viku - 2 stig
3. MATARÆÐI:   Gekk betur en í síðustu viku en borðaði ekki nógu fjölbreytt um helgina - 1 stig
4. VATN:   Þetta er allt að koma en gengur misvel eftir dögum, gekk þó ansi vel þessa vikuna - 2 stig
5. SKÓLI:   Ég má til með að gefa mér tvö stig fyrir allan gotneskulærdóminn, tíu tölvublaðsíður af glósum meðal annars - 2 stig
6. FÖT/SKART/SNYRTIDÓT:   Gekk prýðilega bara, eins og venjulega - 2 stig
7. NAGLALAKK:   Ég rétt slapp og henti á mig grábrúnu lakki áðan - 2 stig
8. SKIPULAG:   Tók dagbókina á nýtt level og skipulagði lærdóminn eftir klukkustundum sem reyndist ansi vel, mun hiklaust halda því áfram - 2 stig
9. ÖÐRUVÍSI:   Æ nei nei nei - 0 stig
10. BLOGG:   Ég fæ prik fyrir að henda í eitt blogg - 1 stig 

 Samtals: 16 STIG
Ágætt, ég bætti mig um tvö frá því síðast. Í næstu viku ætla ég að rífa upp markmið númer 3 og vonandi 9 og 10 líka. Það væri geggjað töff að fá 20 stig í næstu viku, best að stefna bara á það!

Og af því mér finnst blogg þurfa að innihalda að minnsta kosti eina mynd þá fær þessi skemmtilega mynd að fylgja með. Hún var tekin í haustferð Mímis síðustu helgi og gaf stig í ratleik. Þar átti að mynda stafi og svo orð með fólki, þetta orð varð fyrir valinu en bakgrunnurinn var fyrir algjöra tilviljun og uppgötvaðist ekki fyrr en eftir á. Útkoman varð því enn betri mynd. Góðar stundir.

hldr

Gærdagsgeðveiki

Já, geðveiki er sjúkdómur, ég veit. En ég jaðraði alveg við að bilast í gær og enn fremur í dag. Ástæðan var ósköp eðlileg, lokapróf í gotnesku. Það besta við það er að því er nú lokið og þar af leiðandi ætti gotneska ekki að vera aftur á dagskrá hjá mér í bráð - jibbí kóla!

Ég byrjaði gærdaginn í Garðabæjarlauginni þar sem ég tók annan kílómeter, húrra fyrir mér. Að lokinni sundferð hélt ég heim til að læra en henti í þetta magnaða boozt áður en ég fór að lesa.

Ég held að ég hafi toppað sjálfa mig í boozt-gerð með þessu hérna. Ó, namm hvað þetta var gott. Innihaldið var eitthvað á þessa leið:
          - 1 bolli hindber 
          - 2 agnarsmáar perur
          - Handfylli af vínberjum
          - 1/2 mangó og ástaraldin skyrdrykkur
          - 6 myntulauf
          - 1 bolli vatn og smá klaki
Já og svo henti ég smá kókosflögum út á svona upp á punt. Það er alveg klikkað að setja myntu út í svona boozt, hún gefur agalega ferskt og gott bragð. Annars finnst mér þetta orð, boozt, svolítið glatað. Ég heyrði einhverntímann íslenska nýyrðið hyllingur yfir svona drykki, af því þeir væru svo hollir. Ég held nú að það hljóti að vera hægt að búa til orð sem er aðeins meira sjarmerandi yfir þetta, hyllingur hljómar bara eins og eitthvað hættulegt. Jájá.

Kvöldið áður var einhver fótboltaleikur í gangi og því var snædd pítsa hér á bæ. Þá hristi markmið númer þrjú aldeilis hausinn og minnti á stigin núll sem það skoraði í síðustu viku. Úr varð að ég gerði mér salat úr tómötum, gúrku, fetaosti og furuhnetum og steikti brokkolí. Einu sinni fannst mér brokkolí viðbjóður en ég held að ég geti sagt að það er eitt af uppáhöldunum þessa dagana. Í gær ákvað ég að endurtaka leikinn og fékk mér brokkolí í hádegismat, ásamt tveimur flatkökum með kotasælu og papriku. Hrikalega gott og gladdi þriðja markmiðið gríðarlega.

 

Hádegismatur til vinstri og lærdómur og rófa í skál til hægri. Rófa er nefnilega alveg dýrindis matur, rétt eins og brokkolíið. 

Hildur matargikkur er í útrýmingarhættu.

Jæja, nóg komið af matarmyndum og vitleysu. Best að fara að læra fyrir næsta lokapróf sem er eftir viku.

hldr